Ceredigion County Council website

Beth yw'r Rheoliadau Adeiladu: yr hyn y ddylech ei wybod

Mae Rheoliadau Adeiladu a chaniatâd cynllunio yn ofynion cyfreithiol ar wahân. Hyd yn oed os nad oes angen caniatâd cynllunio ar gyfer eich prosiect, mae’n bosib bydd rhaid i chi gydymffurfio â’r Rheoliadau Adeiladu.

Yng Nghymru, mae’r Rheoliadau Adeiladu yn safonau cenedlaethol sy’n berthnasol i’r rhan fwyaf o waith adeiladu—boed yn breswyl neu’n fasnachol. Mae’r rheoliadau hyn ar waith i sicrhau bod ein hamgylchedd adeiledig yn ddiogel, yn iach, ac yn gynaliadwy. Maent hefyd yn gosod safonau ar gyfer effeithlonrwydd ynni, hygyrchedd i bobl ag anableddau, a pherfformiad amgylcheddol cyffredinol.

Fel Arolygwyr Adeiladau Cofrestredig, rydym yn ymfalchïo mewn darparu gwasanaeth rhagweithiol, proffesiynol, sydd yn hawdd i’w ddefnyddio. Mae ein tîm o arolygwyr cymwys yn ymrwymedig i gefnogi eich prosiect gyda chyngor arbenigol ar bob agwedd o’r rheoliadau adeiladu. Trwy gydweithio’n agos ag adrannau Cynllunio, Priffyrdd ac Iechyd yr Amgylchedd, rydym yn helpu i symleiddio’r broses ddatblygu. Fodd bynnag, nid yw hyn yn disodli unrhyw ymgynghoriad rhyngoch chi a’r gwasanaethau unigol hynny a all fod yn angenrheidiol fel rhan o’ch proses gymeradwyo.

Mae ein arolygwyr yn meddu ar wybodaeth leol werthfawr ac yn ymwneud yn weithredol â rhoi cyngor ar ddiogelwch y cyhoedd, gwaith dymchwel, strwythurau peryglus, a diogelwch ar dir chwaraeon. Rydym hefyd yn cydweithio’n agos â Gwasanaeth Tân ac Achub Canolbarth a Gorllewin Cymru a’r gwasanaethau brys eraill i sicrhau diogelwch y cyhoedd ym mhob ardal.

Cyn dechrau unrhyw waith adeiladu, mae’n bwysig gwirio a oes angen cymeradwyaeth Rheoliadau Adeiladu. Y person sy’n gwneud y gwaith adeiladu, ac os nad nhw yw perchennog yr adeilad, yna’r perchennog ei hun sy’n gyfrifol am sicrhau cydymffurfiaeth â’r Rheoliadau Adeiladu.