Rhannwch eich barn ar gynlluniau pont troed Plascrug
Bydd digwyddiad ymgynghoriad cyhoeddus yn cael ei gynnal ar 14 Ionawr i archwilio opsiynau a chynigion ar gyfer Pont Teithio Lesol ym Mhlascrug, Aberystwyth, a gynigir gan Gyngor Sir Ceredigion.
Bydd y digwyddiad yn agored i’r cyhoedd rhwng 10am a 7pm ar y Llawr Gwaelod yn adeilad Swyddfa'r Cyngor Canolfan Rheidol yn Aberystwyth.
Bydd swyddogion ac ymgynghorwyr sy’n gweithio ar ran Cyngor Sir Ceredigion, wrth law i gyflwyno gwahanol opsiynau arfaethedig i wella cysylltedd teithio llesol yn y lleoliad hwn. Bydd yr ymgynghoriad hefyd yn cynnwys paneli arddangos a modelau 3D o’r opsiynau.
Dywedodd y Cynghorydd Shelley Childs – Aelod Cabinet dros Briffyrdd a Gwasanaethau Amgylcheddol “Mae swyddogion wedi bod yn datblygu cynigion i osod strwythur pont fwy llydan a fyddai’n gwella mynediad i feicwyr, cerddwyr a’r gymuned olwynion, tra’n bodloni’r safonau dylunio cyfredol. Mae hon yn groesfan bont boblogaidd iawn, sy’n gwasanaethu fel cyswllt pwysig i nifer o ysgolion a chyfleusterau hamdden yn yr ardal hon, gan arbed defnyddwyr taith llawer hirach trwy ganol y dref.
Mae'r rhan hon o Aberystwyth wedi datblygu'n sylweddol ers gosod strwythur gwreiddiol y bont tua 20 mlynedd yn ôl, a bydd angen i unrhyw bont newydd fod yn ehangach i ddarparu ar gyfer lefelau cynyddol o'r defnydd presennol a'r cynnydd disgwyliedig yn y dyfodol wrth i ymddygiadau teithio cymdeithasol trefol newid. Fodd bynnag, mae cyfyngiadau sylweddol yn y maes hwn a achosir yn rhannol gan y datblygiad cynyddol hwn sydd wedi gwneud y cynigion hyn yn fwy heriol o safbwynt peirianneg. Bydd y cyhoedd yn gallu gweld pethau positif a negyddol pob opsiwn cyn dewis yr opsiwn i'w ddatblygu ymhellach."
Bydd yr ymgynghoriad ar agor am chwe wythnos o 14 Ionawr 2026 ymlaen.
Gellir gweld rhagor o fanylion am y cynigion a’r digwyddiad ymgynghori hwn ar wefan y Cyngor: Cynllun Pont Plascrug - Cyngor Sir Ceredigion
06/01/2026