Awdurdod Lleol Ceredigion yn Cefnogi Mudiad Cenedlaethol Plentyndod Heb Ffonau Clyfar
Mae Cyngor Sir Ceredigion, mewn partneriaeth ag ysgolion a theuluoedd ledled y sir, yn falch o gyhoeddi ei gefnogaeth i’r mudiad cenedlaethol Plentyndod Heb Ffonau Clyfar. Mae’r menter yn hyrwyddo plentyndod sy’n llawn rhyddid, chwarae ac ymddygiad cymdeithasol cadarnhaol.
Cefndir y Fenter
Mae’r mudiad yn annog rhieni a gofalwyr i oedi cyn darparu ffonau clyfar tan o leiaf 14 oed, ac i osgoi defnyddio cyfryngau cymdeithasol tan 16 oed. Fel rhan o’i ymrwymiad, mae’r Cyngor wedi rhannu canllawiau ymarferol gydag ysgolion ac wedi darparu adnoddau i gefnogi lleihad mewn amser sgrin a chreu arferion iach i deuluoedd.
Nid polisi nac orfodaeth gyfreithiol yw’r ymgyrch yma, menter wirfoddol a arweinir gan y gymuned ydyw, sy’n seiliedig ar gydweithio rhwng teuluoedd, ysgolion a chymunedau lleol. Yn genedlaethol, mae’r fenter eisoes wedi denu momentwm sylweddol, gyda dros 151,000 o deuluoedd a 12,000 o ysgolion wedi llofnodi’r cytundeb, yn ôl y wefan genedlaethol.
Pam mae hyn yn bwysig?
Mae tystiolaeth gynyddol yn cysylltu gorddefnydd ffonau clyfar â:
- lefelau uwch o bryder ac iselder
- problemau cysgu
- gostyngiad mewn gallu i ganolbwyntio
- mwy o unigedd cymdeithasol
Trwy ohirio mynediad at ffonau clyfar, gall plant elwa ar well lles meddwl, mwy o ffocws yn yr ysgol, ac mwy o ryngweithio wyneb-yn-wyneb. Mae’r fenter hefyd yn cyfrannu at ddiogelu pobl ifanc rhag risgiau ar-lein megis seiberfwlio a chynnwys amhriodol.
Dechreuodd y Cyngor gydweithio â rhieni ac ysgolion yn nhymor yr haf 2025. Er bod y fenter yn ei chamau cynnar yn lleol, mae diddordeb a chefnogaeth yn tyfu’n gyflym, gyda mwy o deuluoedd ac ysgolion yn cofrestru o wythnos i wythnos.
Dywedodd Laurie Hughes, Athro Ymgynghorol Llesiant Uwch: “Rydym am roi’r cyfle gorau i blant ffynnu’n rhydd o bwysau cysylltedd cyson a’r posibilrwydd o niwed. Mae’r fenter hon yn ymwneud â sicrhau plentyndod iach a hapus i bob plentyn a pherson ifanc yng Ngheredigion. Mae ffonau symudol a chyfryngau cymdeithasol wedi bod yn bwnc llosg ers tro, ac rydym yn dechrau gweld newid mewn agweddau a diwylliant, yn lleol, yn genedlaethol a byd-eang.”
Ychwanegodd Cynghorydd Cynghorydd Wyn Thomas, Aelod Cabinet Ceredigion ar gyfer Ysgolion, Dysgu Gydol Oes a Sgiliau: “Mae’r ymgyrch yma bendant yn cynghori pobl ifanc Ceredigion i gael plentyndod mwy iach a chytbwys. Mae tystiolaeth yn glir fod lleihau mynediad cynnar at ffonau clyfar yn gallu hybu lles, diogelwch a pherthnasau cymdeithasol cadarnhaol. Rydym yn falch o weithio gyda theuluoedd ac ysgolion ar draws y sir i feithrin amgylchedd lle gall plant dyfu, dysgu a ffynnu heb bwysau diangen technoleg sy’n addasu’n rhy gyflym.”
19/01/2026