Llwyddiant yng Nghynadledd Gwaith Ieuenctid Ceredigion 2025
Ar 24 Mehefin 2025, daeth dros 100 o bobl ifanc, Gweithwyr Ieuenctid, addysgwyr a phartneriaid ynghyd yng Nghanolfan Gynadledda Medrus, Prifysgol Aberystwyth, ar gyfer Cynhadledd Gwaith Ieuenctid 2025, a gynhaliwyd fel rhan o Wythnos Gwaith Ieuenctid yng Nghymru.
Roedd y digwyddiad yn cynnwys areithiau allweddol, gweithdai rhyngweithiol a chyflwyniadau gan bobl ifanc, pob un yn canolbwyntio ar ddathlu pŵer Gwaith Ieuenctid ac ymhelaethu ar leisiau pobl ifanc ledled Ceredigion a thu hwnt.
Wrth agor y gynhadledd, dywedodd Barry Rees, Cyfarwyddwr Corfforaethol Cyngor Sir Ceredigion: “Roedd Cynhadledd Gwaith Ieuenctid Ceredigion 2025 yn atgof pwerus o egni, creadigrwydd a photensial ein pobl ifanc. Roedd yn fraint agor y digwyddiad a gweld y gwaith ysbrydoledig sy'n cael ei wneud ar draws ein cymunedau i gefnogi ac annog y genhedlaeth nesaf.”
Roedd y diwrnod yn cynnwys cyfraniadau gan siaradwyr ifanc sef Chelsea Jones a Gwen Evans, a rannodd eu teithiau personol mewn Gwaith Ieuenctid, ochr yn ochr â chyflwyniadau allweddol gan ffigurau blaenllaw yn y sector gan gynnwys Dr. Howard Williamson, Emma Chivers a Caleb Jackson.
Dywedodd Chelsea Jones: “Roedd y gynhadledd yn gyfle gwych i rannu arfer da a chlywed gan addysgwyr o wahanol gefndiroedd. Fel person ifanc sydd wedi bod yn ymwneud â Gwaith Ieuenctid drwy gydol fy arddegau, ac sydd bellach yn astudio i fod yn Weithiwr Ieuenctid, mwynheais y profiad o rannu fy nhaith Gwaith Ieuenctid fy hun gydag eraill yn fawr.”
Archwiliodd y gweithdai bynciau fel Gwaith Ieuenctid a chyflogaeth, profiadau digidol, ymgysylltu rhyng-genedlaethol, a dulliau arloesol fel realiti rhithwir.
Adlewyrchodd Gethin Jones, Rheolwr Corfforaethol Gwasanaeth Ieuenctid Ceredigion, ar lwyddiant y digwyddiad a dywedodd: “Roedd y gynhadledd hon yn ddathliad o arloesedd Gwaith Ieuenctid, gan ymateb i’r materion allweddol a bleidleisiwyd arnynt gan bobl ifanc yng Ngheredigion, hyrwyddo cydweithio a chysylltiadau. Roedd yr egni a’r brwdfrydedd drwy gydol y dydd yn anhygoel, ac rydym yn falch o fod wedi creu amgylchedd lle roedd pobl ifanc a gweithwyr proffesiynol yn teimlo eu bod yn cael eu clywed, eu gwerthfawrogi a’u hysbrydoli.”
Bydd Gwasanaeth Ieuenctid Ceredigion yn rhannu uchafbwyntiau a safbwyntiau o’r diwrnod ar draws ei lwyfannau cyfryngau cymdeithasol. Dilynwch gan ddefnyddio’r hashnodau #WythnosGwaithIeuenctid25 a #CynhadleddIeuenctidCeredigion25.
Am ragor o wybodaeth am Wasanaeth Ieuenctid Ceredigion ewch i @GICeredigionYS ar Facebook, Instagram, ac X.