Ceredigion County Council website

Bob dydd, mae gweithlu Cyngor Sir Ceredigion (Tîm Ceredigion) yn gweithio ledled ein cymunedau, gan ddarparu gwasanaethau a chymorth sy'n helpu i wneud gwahaniaeth i fywydau pobl leol. Nawr, maent yn mynd â'r ymrwymiad hwnnw gam ymhellach drwy lansio digwyddiad elusennol blynyddol newydd a fydd yn dod â chydweithwyr, teuluoedd a ffrindiau ynghyd i godi arian hanfodol a chefnogi achosion sy'n gwneud gwahaniaeth gwirioneddol i fywydau pobl.

Her 20 milltir

Eleni, bydd cydweithwyr o bob rhan o wasanaethau'r Cyngor yn dod ynghyd ar ddydd Sadwrn, 26 Medi, i ymgymryd â thaith gerdded elusennol 20 milltir gan ymlwybro o Ganolfan Rheidol yn Aberystwyth, pencadlys gweithredol y Cyngor, i Benmorfa yn Aberaeron, ei bencadlys democrataidd.

Bydd y llwybr yn tywys y cerddwyr drwy rai o gymunedau arfordirol harddaf Ceredigion, gan gynnwys Rhydyfelin, Llanddeiniol a Llanrhystud, cyn ymuno â Llwybr Arfordir Cymru ar gyfer y rhan olaf o'r daith tuag at Aberaeron.

Cefnogi dau achos pwysig

Cynhelir y digwyddiad yn ystod Mis Ymwybyddiaeth Lymffoma a bydd yn codi arian ac ymwybyddiaeth ar gyfer dwy elusen sy'n cefnogi pobl yr effeithir arnynt gan ganser: Lymphoma Action a Young Lives vs Cancer.

Lymffoma yw'r canser gwaed mwyaf cyffredin yn y DU, ac eto mae ymwybyddiaeth o'r cyflwr yn gymharol isel o hyd. Mae digwyddiadau fel hwn yn gyfle i daflu goleuni ar lymffoma, gan godi arian hanfodol i sefydliadau sy'n cefnogi pobl sy'n byw gyda chanser a'u teuluoedd.

Mae Lymphoma Action yn darparu gwybodaeth ddibynadwy, cymorth a chyngor i bobl sy'n byw gyda lymffoma, tra bod Young Lives vs Cancer yn cefnogi plant, pobl ifanc a'u teuluoedd drwy'r heriau y gall canser eu cyflwyno.

Dangos eich cefnogaeth

P'un a ydych yn dewis ymgymryd â'r her, yn mynd i annog y cerddwyr ar hyd y ffordd, neu'n rhoi rhodd ariannol, bydd pob cyfraniad yn helpu i gefnogi pobl a theuluoedd sy'n wynebu rhai o heriau anoddaf bywyd.

Os hoffech ddangos eich cefnogaeth, gallwch wneud rhodd i'r elusennau drwy dudalennau JustGiving Tîm Ceredigion isod.

Diolch yn fawr am eich cefnogaeth.