Mae gwaith o ddatblygu darpariaeth model gwledig o ofal cymunedol a thai yn ardal Tregaron yn parhau.
Mae Cyngor Sir Ceredigion a Bwrdd Iechyd Prifysgol Hywel Dda, ynghyd â Llywodraeth Cymru, yn parhau i fod yn ymrwymedig iawn i ddarparu Canolfan Adnoddau Integredig yn Nhregaron - Cylch Caron - i fod yn wasanaethau iechyd a gofal cymdeithasol lleol, ochr yn ochr â chartrefi fforddiadwy o ansawdd uchel.
Mae gweithgor o swyddogion y Bwrdd Iechyd a’r Cyngor yn adolygu ac yn diweddaru'r achos busnes tra bod y tendr i nodi partner cyflenwi newydd yn cael ei baratoi.
Dywedodd Cadeirydd Bwrdd y Prosiect, Peter Skitt, ar ran yr holl bartneriaid: “Mae gwaith yn mynd rhagddo ar gynllun Cylch Caron y tu ôl i'r llenni rhwng partneriaid ymroddedig ar gyfer model cymdeithasol integredig ar gyfer iechyd. Rydym yn ail-ganolbwyntio ar ddatrysiad cyraeddadwy i'r gymuned yn Nhregaron a'r ardal gyfagos.”
Ar hyn o bryd mae'r bartneriaeth yn trefnu Digwyddiad Ymgysylltu â Chynigwyr i'w gynnal ym mis Hydref i ddechrau'r broses o ddenu partner cyflenwi newydd i weithio ar y cynllun. Y bwriad yw i'r broses dendro ffurfiol gychwyn yn fuan ar ôl y digwyddiad.
Bwriad prosiect Cylch Caron yw darparu meddygfa teulu, fferyllfa gymunedol, clinigau cleifion allanol, cyfleusterau nyrsio cymunedol a gofal cymdeithasol, yn ogystal â thai gofal ychwanegol ar un safle.
09/08/2021